Isang asong kalye o “askal” sa Cagayan De Oro, nag-migrate sa Canada
Larawan ay mula sa BecomingFilipino - Facebook Page |
Nasa Canada na ngayon ang isang asong kalye o “askal.” Ang naturang aso ay kinupkop at minahal ng isang Canadian matapos niya itong makita sa tapat ng kanilang bahay sa Cagayan De Oro.
Base sa kuwento ng page ng “Becoming Filipino,” isang taon na ang nakalilipas nang bigla na lamang sumulpot sa tapat ng kanilang bahay ang dating madumi, patpatin, at mahinang asong kalye. Nagkataon naman daw na nakita ito ng Canadian niyang kaibigan na si Bret Maverick na nakikituloy sa kanya noon.
Hindi niya raw akalain na malambot ang puso ni Maverick sa mga aso kaya naman, kinupkop niya ang aso para maayos ang kondisyon nito. Sa una, intensyon lamang ni Maverick na tulungan ang askal, ngunit nauwi ang dalawa sa mabuting pagkakaibigan.
Dahil napamahal na ang aso sa Canadian, pinangalanan niya itong “Butter.” Tila hinango ang kanilang pangalang “Bret and Butter” sa katagang “Bread and Butter.” Lumipas ang isang buwan at gumanda nga ang kondisyon ni Butter.
Lumalim ang koneksyon ni Maverick kay Butter. Kahit saan siya magpunta ay naroon din ang askal.
Sa pagkakaroon ng matibay na koneksyon, nagdesisyon ang Canadian na isama ang aso sa pag-uwi niya sa Canada. Isa nang maituturing na Canadian ang noo’y mahina at palaboy na si Butter.
Pinuri naman ng mga netizens si Maverick dahil sa ginawa niyang pagkupkop sa isang asong kalye. “Sana all” ang nasambit ng ilan dahil nadaig daw sila ng asong si Butter dahil nakarating na ito sa Canada, sa tulong ni Maverick.
Source: Furry Category
No comments