4-Milyong Piso, natangay ng faceshield scammer sa mga online seller
 |
| Larawan ay mula sa pinasbalita |
Kamakailan lamang ay idineklara ng pamahalaan ang mandatory na pagsusuot ng face shield sa tuwing lalabas ng kanilang mga tahanan. Bunsod na rin ito ng mabilis na pagtaas ng bilang ng mga taong nagpopositibo sa coronavirus d¡sease 2019 (C0VID-19).
Kaya naman, inaasahang maghahanap at bibili na ang ilan nating kababayan ng mga face shield. Dahil din dito, kaniya-kaniya ng hanap ang mga online sellers ng murang supplier ng face shield upang may mapagkakitaan pa rin kahit sa panahon ng pandemya.
Sinamantala naman ito ng mga kawatan upang makapagnakaw ng kaunting puhunan mula sa mga nasabing sellers. Hindi malaman ngayon ng maraming mga online sellers ang gagawin dahil nalugmok sila sa isang scam ng nagpanggap na murang supplier ng faceshield sa Binondo, Manila.
Ayon sa mga ulat, isang babae ang tumawag at nagpakilala raw sa mga sellers na mag-aalok ng murang face shield. Base sa salaysay ng mga biktima, tila propesyonal daw kung makipag-usap ang babae kaya naman nagtiwala na ang mga sellers na ito sa kaniya.
Alok ng scammer sa mga bikitima, P13 hanggang P20 kada piraso ng face shield. Sobrang mura raw nito at maaaring ibenta sa halagang P45 hanggang P50 kaya naman marami sa kanila ang kumagat sa patibong na pala ng scammer.
Sunod-sunod din ang mga online posts ng mga kunwaring bibili ng maramihan. Ayon sa mga nagkunwaring buyers, handa raw silang bumili ng 50,000 hanggang 500,000 piraso ng face shields.
Dahil sa mga ito, marami ang na-engganyong um-order at magbayad agad sa ‘di nakilalang scammer. Base sa kanilang diskusyon, susunduin ng mga seller ang mga in-order na face shield sa Binondo. Subalit, ni anino ng supplier – walang dumating.
Tila naging instant millionaire ang scammer na ito dahil tinatayang nasa higit P4-miilion ang nakulimbat niya sa mga online sellers. Hindi ngayon malaman ng mga biktima kung paano ipaliliwanag sa mga um-order at nagbayad ang nangyaring panloloko sa kanila.
Hinala ng karamihan, plinano talagang mabuti ng mga kawatan na gamitin ang social media upang makakulimbat ng milyon-milyong salapi. Kasabwat daw ng scammer ang mga nagpanggap na mga buyer upang tumaas ang demand sa face shield.
Dahil sa nangyari, payo ng isang netizen, huwag basta-basta agad maniniwala sa malaking tubong alok ng hindi kilalang tao. Maging mapanuri rin daw at maging maingat upang hindi mabiktima ng mga scammer.
Source: pinasbalita
Source: Furry Category
No comments