Binaba lang ang facemask para uminom, Hinuli
 |
| Larawan ay mula sa noypiako |
Inaresto ng mga pulis ang isang lalaking nagbibisikleta sa Marikina City sa kadahilanang hindi umano tama ang pagsusuot nito ng facemask, noong Agosto 8. Ngunit ayon sa siklista, ibinaba niya lamang ang facemask upang makainom ng tubig.
Ayon sa ulat ng News5, isinalaysay ni Michael Manalaysay na huminto muna siya saglit sa isang tabi para makapagpahinga at uminom nang madatnan ng mga awtoridad.
Nagbibisikleta ang lalaki mula Montalban, Rizal hanggang Mandaluyong City para lamang makapasok sa trabaho.
Pahayag ni Manalaysay, “Nagpahinga lang ako dahil ang layo ng bina-bike… bigla ako hinuli ng mga pulis ng walang warning.”
Isinakay ang siklista sa police mobile at dinala sa headquarters kung saan siya kinuhanan ng mugshot. Pinagmulta rin siya ng isang libong piso (P1,000) bunsod ng umano’y paglabag sa quarantine protocol.
“Para akong holdaper o rapist na pinicturan pa ako na may hawak na karatula. Feeling ko sobrang laki ng kaso. Binaba ko lang facemask ko para uminom,” sabi pa ni Manalaysay.
Panawagan niya sa mga kinauukulan, sana raw ay maging patas sila at huwag pairalin ang pagiging gahaman sa panahon ngayon na may pandemya.
“Magtulungan tayo, hindi ‘yong manggugulang ng tao. At ‘yong 1k na hiningi niyo sa akin, mahirap hanapin ‘yan lalo na’t walang-wala kami ngayon. Pang-bigas na rin ‘yang 1k na ‘yan,” dagdag pa ng siklista.
Wala pang inilalabas na pahayag ang Marikina Police patungkol sa insidente.
Mandatory ang pagsusuot ng facemask, sa ilalim ng Ordinance No. 47, tuwing lalabas ng bahay o pupunta sa pampublikong lugar. Papatawan ng kaukulang parusa ang sinumang lalabag dito.
Source: Furry Category
No comments