Pinakahihitay na DNA Result nina John Regala at John Santos, Lumabas na
 |
| Larawan: Screenshot mula sa Youtube video ng Raffy Tulfo in Action |
Lumabas na ang DNA result ng aktor na si John Regala at ang truck driver na nagsasabing anak niya na si John Santos sa isa sa mga episode ng programang “Raffy Tulfo in Action” na ini-ere noong Setyembre 09.
Matatandaang itinanggi ni Regala na anak niya si Santos ngunit iginigiit ng huli na anak talaga siya ng aktor. Ayon sa ina ni Santos na si Vilma Santos, nagkita raw sila ni Regala sa Japan at doon ay may namagitan sa kanilang dalawa.
Nang makausap na ni Raffy Tulfo si Regala, kinumusta niya muna ito. Tinanong naman niya kung ano sa tingin ni Regala ang resulta sa DNA test, binanggit niyang “come what may” at tatanggapin naman daw niya ito.
Handa na ring malaman ni Santos kung ano ang naging resulta. Nais niya na rin umanong malinawan sa tanong ng kanyang buhay kung sino ba ang kanyang ama.
Ilang beses pang binitin ni Tulfo ang dalawa bago ianunsyo ang resulta ng DNA test.
“Ikaw po, Sir John Paul Santos ay… hindi po kayo anak ni Mr. John Regala,” pagsisiwalat ni Tulfo. Zero probability ang makikita sa nasabing DNA result. Bibigyan daw ni Tulfo ang dalawa ng kopya ng resulta “for future reference.”
Mensahe ni Regala para kay Santos, “Iho, kung naguguluhan ka man sa ngayon, matatagpuan mo rin ang sagot balang araw. Kung ako talaga ang ama mo, talagang ipagmamalaki kita, yayakapin kita, lalo na malapit na ang kaarawan ko. Isang regalo ka para sa akin. Kaya lang na-disappoint ako, na-pursuade ako, hindi kita naging anak. Nakikisimpatya ako sa’yo, at alam ko ang nararamdaman mo dahil ‘yan din ang pakiramdam ko sa ngayon.”
Puwedeng-puwede raw ituring ni Santos ang aktor bilang isang tunay na ama. Huwag daw siyang mag-alinlangang lumapit kay Regala kung siya ay may problema. Aakuin daw siya ni Regala bilang anak.
Nalungkot at lumuluha man, nagpapasalamat pa rin si Santos dahil malinaw na umano sa kanya ang lahat. Pinayuhan din siya ni Tulfo na kausaping muli ang kanyang ina patungkol sa isyung ito.
Source: Raffy Tulfo in Action - Youtube Channel
Source: Furry Category
No comments